ஒரிஜினல் பெண் குரலையே தோற்கடிக்கும் சொக்கவைக்கும் குரல்.. யாரா இருந்தாலும் ஏமாந்துடுவாங்க அடேய் நீயா இந்த குரலுக்கு சொந்தக்காரன்?

“இப்போ ஏன் இந்த காலை ரெக்கார்டிங் போட்டிருக்க? உனக்கு சேஃபா இருக்கணும்னா? உனக்கு எந்த பிரச்சனையும் வராது கார்த்திக்” இப்படி கொஞ்சலான கோபத்துடன் பேசுவது பெண் அல்ல... ஆணின் குரல் என்றால் நம்ப முடிகிறதா? அப்படித்தான், நம்பி ஏமாந்து, பணத்தை இழந்த சம்பவம் அதிர்ச்சியை ஏற்படுத்தியுள்ளது. கண்ணால் காண்பதும் பொய்... காதால் கேட்பதும் பொய்... தீர விசாரிப்பதே மெய் என்பதை உணர்த்தியிருக்கிறது. சென்னை கதிர்வேடு பகுதியில் ஆர்க்கிடெக் வேலை பார்க்கும் கார்த்திக் (30) என்பவர், கடந்த ஏப்ரல் மாதம் தனக்கு மணப்பெண் தேடி தனியார் திருமண இணையதளத்தில் பதிவு செய்துள்ளார். அதில், ஜஸ்வர்யா என்ற இளம்பெண்ணின் கணக்கிலிருந்த ஐஸ்வர்யா பாண்டியன் என்பவர் அறிமுகமாகி Whatsapp மூலம் பேசி வந்ததாக தெரிவித்துள்ளார். திருமண இணையதளத்தின் மூலம் நட்பாக பேசிய அந்த இளம்பெண்,தான் ஐ ஆர் எஸ் பயிற்சியில் டெல்லி, பரிதாபாத், முசோரி ஆகிய இடங்களில் மேற்கொள்வதாகவும், தனக்கு சில பொருட்களை வாங்க வேண்டும் என ஆசை வார்த்தை காட்டி பேசியதாகக் கூறப்படுகிறது. பின்னர், தனது தந்தை பஹ்ரைனில் இறந்தவிட்டதாகவும், பிறகு அவரது தாயாரும் இறந்துவிட்டதாகவும் என பல்வேறு காரணங்கள் கூறி பணம் வேண்டும் எனவும் கார்த்திக்கிடம் பணத்தைப் பறித்ததாகவும் கூறப்படுகிறது. தனக்கு வேண்டிய பணத்தை அவரது அண்ணன் ராம்குமார் பாண்டியனின் வங்கி கணக்கிற்கு பணம் அனுப்ப வேண்டியும், பணம் அனுப்பவில்லை என்றால் தற்கொலை செய்து கொள்வதாகவும் கூறி மிரட்டியுள்ளார். இதனை நம்பி கார்த்திக் பல்வேறு தவணைகளாக ஏப்ரல் 5 ஆம் தேதி முதல் ஆகஸ்ட் 7ஆம் தேதி வரை ராம்குமார் பாண்டியனின் வங்கி கணக்கில் மொத்தம் பணம் சுமார், 9 லட்சத்து 52 ஆயிரம் ரூபாய் பணத்தை கார்த்திக் அனுப்பியுள்ளார். அதன் பின்னர் ஐஸ்வர்யா தொடர்பை துண்டித்ததால், ஏமாற்றம் அடைந்தது தெரியவந்ததாகவும், மோசடியில் ஈடுபட்டவர் மீது நடவடிக்கை எடுக்கும்படியும் கார்த்திக், மேற்கு மண்டல சைபர் கிரைம் காவல் நிலையத்தில் புகார் அளித்தார். கார்த்திக் கொடுத்த புகாரின் மீது பல்வேறு பிரிவுகளில் வழக்குப் பதிவு செய்து விசாரணை மேற்கொள்ளப்பட்டது. மேற்கு மண்டல சைபர் கிரைம் போலீசார் தீவிர விசாரணை செய்து, ராம்குமார் பாண்டியன் என்பவரை தேனி மாவட்டத்தில் பிடித்து விசாரணை செய்தனர். விசாரணை செய்ததில் பல திடுக்கிடும் தகவல் வெளியானது. அதாவது, ஐஸ்வர்யா பாண்டியன் என்கிற பெயரில் ராம்குமார் பாண்டியன் சொக்கவைக்கும் பெண் குரலில் பேசி வந்தது தெரியவந்தது. கைதான ராம்குமார் பாண்டியன் பிகாம் எம் பி ஏ பட்டதாரி என்பது தெரியவந்தது. தன்னுடைய குரல் பெண் குரல் போன்று இருப்பதை சாதகமாக பயன்படுத்திக் கொண்டு இதுபோன்ற நூதன மோசடியில் ஈடுபட்டது தெரியவந்துள்ளது. தான் யாரிடம் செல்போனில் பேசினாலும் எதிர்முனையில் இருப்பவர்கள் பெண் பேசுவதாக நினைத்து “மேடம் சொல்லுங்க மேடம்” எனக் கூறிப் பேசுவதால், இந்தப் பெண் குரலை வைத்து அனைவரையும் மோசடி செய்ய ஆரம்பிக்கலாம் என ராம்குமார் பாண்டியன் ஈடுபட்டது தெரியவந்துள்ளது. வீடியோ காலில் வரச் சொன்னால் ஐ ஆர் எஸ் பயிற்சியில் இருப்பதால் வீடியோ காலில் பேசக்கூடாது எனக்கு கூறி ஏமாற்றியுள்ளார். பாதிக்கப்பட்ட பல ஆண்களிடம் விசாரிக்கப் பட்ட போது திருமண இணையதளத்தில் போடப்பட்டிருக்கும் பெண்ணின் புகைப்படம் மிகவும் அழகாக இருந்ததாகவும், இவர் வாழ்க்கைத் துணையாக இருந்தால் நன்றாக இருக்கும் என்ற அடிப்படையில் ஏமாந்து போனதாகவும் தெரிவித்துள்ளனர். மேலும் சிவில் சர்வீஸ் பயிற்சி எடுப்பதாக கூறியதால் நல்ல படித்த அழகான பெண்ணைத்தான் மனைவியாக அடையப்போகிறோம் என்ற ஆசையில் வலையில் விழுந்ததாக தெரிவித்துள்ளனர். தமிழ்நாடு முழுவதும் பெண் தேடும் பல மாப்பிள்ளைகளை குறிவைத்து இதுபோன்ற மோசடியை அரங்கேற்றியதோடு, ஒவ்வொரு ஜாதியினர் தொடர்பான திருமண இணையதளத்திலும் பதிவு செய்து இந்த மோசடி செய்தது தெரியவந்துள்ளது. குறிப்பாக 2024 ஆம் அண்டு முதல் Ishwarya என்ற பெயரில் போலியாக Community Matrimony, Tamil Matrimony, Bharat Matrimony, Jodi App ஆகிய திருமண இணையதளங்களில் கணக்குகள் துவங்கி திருமணத்திற்கு பெண் தேடுபவர்களை குறி வைத்து மோசடி செய்ததாக தெரிவித்துள்ளார். அதுமட்டுமல்ல, சொந்த ஊர் மக்களை ஐ ஆர் எஸ் அதிகாரி என்றும் போதை பொருள் தடுப்பு பிரிவு அதிகாரி என்றும் நம்ப வைத்து வேலை வாங்கித் தருவதாகவும் மோசடி செய்துவந்தது விசாரணையில் அம்பலமாகியுள்ளது. குறிப்பாக புலன் விசாரணை அதிகாரி என கூறிக்கொண்டு ஊரிலுள்ள சில அப்பாவி மக்களை தன் ரகசிய விசாரணைக்கு பயன்படுத்துவதாக கூறி அவர்கள் மூலமாக சிம்கார்டுகள் வங்கி கணக்குகளை வாங்கி விசாரணைக்கு பயன்படுத்துவதாக ஏமாற்றியதும் தெரியவந்துள்ளது. இன்ஸ்டாகிராமில் ஐஸ்வர்யா என்ற பெயரில் அழகான பெண்ணின் புகைப்படத்தை பயன்படுத்தி திருமண இணையதளத்தில் பதிவிட்டு பெண் தேடுபவர்களுக்கு ஆசை வலை வீசி நம்ப வைத்துள்ளார். குடும்பமாக பழகுவது போல் காட்டுவதற்காக மூன்று வகையான சிம் கார்டுகளை பயன்படுத்தி தன்னிடம் சிக்குபவர்களை ஏமாற்றியது தெரியவந்துள்ளது. அம்மா எனக் கூறிக்கொண்டு ஒரு சிம் கார்டிலும் அண்ணன் எனக் கூறிக்கொண்டு ராம்குமார் பாண்டியன் என்ற பெயரில் ஒரு சிம்கார்டிலும், ஐஸ்வர்யா எனக்கூறி ஒரு சிம் கார்டிலும் நாடகமாடி பணத்தைப் பறித்துள்ளார். பெண் தேடும் பலரையும் ஏமாற்றி சுமார் ஒரு கோடி ரூபாய் அளவிற்கு மோசடி செய்திருக்கலாம் என போலீசார் தெரிவித்துள்ளனர். மேலும் இன்னும் எத்தனை பேரை இதுபோன்று ஏமாற்றியுள்ளார் என்பது குறித்து போலீசார் தீவிர விசாரணை நடத்தி வருகின்றனர் பாதிக்கப்பட்டவர்கள் சென்னை சைபர் கிரைமில் புகார் அளிக்கலாம் எனவும் போலீசார் கூறியுள்ளனர் கைது செய்யப்பட்ட ராம்குமார் பாண்டியனிடமிருந்து குற்றச் செயலுக்கு பயன்படுத்திய 2 செல்போன்கள், 1 லேப்டாப், ATM Card-06, Bank Passbook-2, Cheque Book-2, Sim Card -6, IRS Seal மற்றும் காரில் வைத்துக்கொள்ள Narcotics Department Name Board கைப்பற்றப்பட்டு, அவரது வங்கி கணக்கிலுள்ள பணம் 1 லட்சத்து 52 ஆயிரம் ரூபாய் முடக்கம் செய்யப்பட்டது. மேலும் விசாரணையில் ராம்குமார் இதே போன்று ஏற்கனவே 44 இலட்சம் ரூபாய் ஏமாற்றியது தொடர்பான கோட்டுபுரம் காவல் நிலைய வழக்கில் சம்மந்தப்பட்டுள்ளது தெரியவந்தது. கைது செய்யப்பட்ட ராம்குமார் பாண்டியன், விசாரணைக்குப் பின்னர் சைதாப்பேட்டை குற்றவியல் நடுவர் நீதிமன்றத்தில் ஆஜர் செய்து, நீதிமன்ற உத்தரவுப்படி சிறையில் அடைக்கப்பட்டார்.