பொன்னேரி சிங்கிலிமேடு பகுதியைச் சேர்ந்த ராஜேஸ்வரி என்ற 35 பெண், திருவள்ளூர் மாவட்டம் பொன்னேரி அரசு மருத்துவமனையில் கணினி ஆபரேட்டராக வேலை பார்த்து வந்துள்ளார். இந்நிலையில், திங்கட்கிழமையன்று மாலை 7 மணி அளவில், ராஜேஸ்வரி மருத்துவமனையில் பணியில் இருந்துபோது, அவரை பார்க்க பொன்னேரி மாதவரம் பகுதியைச் சேர்ந்த பிரகாஷ் என்பவர் மருத்துவமனைக்கு வந்துள்ளார். அரசு மருத்துவமனையில் பரபரப்பு..! திடீரென தான் மறைத்து வைத்திருந்த பெட்ரோல் பாட்டிலை வெளியே எடுத்த பிரகாஷ், ராஜேஸ்வரி மீது பெட்ரோலை ஊற்றியுள்ளார். உடனே பயந்துபோன ராஜேஸ்வரி, அங்கிருந்து தப்பித்து ஓட முயன்றபோது, பிரகாஷ் தீயிட்டு கொளுத்தியுள்ளார். உடல் எரிந்து அலறி துடித்த ராஜேஸ்வரிவை, அங்கிருந்த ஊழியர்கள் மற்றும் பொதுமக்கள் உடனடியாக போர்வை மற்றும் துணிகளால் தீயை அணைத்து மீட்டுள்ளனர். மேலும், பிரகாஷ் அங்கிருந்து தப்பித்து சென்றுள்ளார். 50 சதவீத தீக்காயங்களோடு சிகிச்சை..! பொன்னேரி காவல்துறையினருக்கு அளித்த தகவலின் அடிப்படையில் உடனடியாக சம்பவ இடத்திற்கு விரைந்த பொன்னேரி காவல்துறையினர், அப்பெண்ணை மீட்டு முதலுதவி அளித்து 50 சதவீத தீக்காயங்களோடு கீழ்பாக்கம் அரசு மருத்துவமனைக்கு சிகிச்சைக்காக 108 ஆம்புலன்ஸ் மூலம் அனுப்பி வைத்தனர். சுடுகாட்டில் சூட்டுப்பிடித்த போலீசார்..! மூன்று தனிப்படைகள் அமைத்து பிரகாஷை போலீசார் தேடி வந்தனர். பிரகாஷ் பொன்னேரி சுடுகாட்டில் தலைமறைவாக இருப்பதாக போலீசாருக்கு தகவல் கிடைத்ததால், தனிப்படை போலீசார் அங்கு சென்றுள்ளனர். அப்போது உதவி ஆய்வாளர் தமிழரசனை பிரகாஷ் அரிவாளால் வெட்டியதாகவும், தங்களை தற்காத்து கொள்ள பொன்னேரி காவல் ஆய்வாளர் சிவக்குமார் அவர் வைத்திருந்த துப்பாக்கியால் குற்றவாளியின் காலில் சுட்டு பிடித்ததாகவும் கூறப்படுகிறது. காயமடைந்த குற்றவாளி பிரகாஷ் பொன்னேரி அரசு மருத்துவமனையில் முதலுதவி அளிக்கப்பட்டு சென்னை ஸ்டான்லி அரசு மருத்துவமனையில் மேல் சிகிச்சைக்காக அனுமதிக்கப்பட்டுள்ளார். காயமடைந்த உதவி ஆய்வாளர் தமிழரசன் பொன்னேரி அரசு மருத்துவமனையில் சிகிச்சை பெற்று வருகிறார். பெட்ரோல் ஊற்றி எரித்தது ஏன்? மருத்துவமனை ஊழியரை, பிரகாஷ் பெட்ரோல் ஊற்றி எரித்தது ஏன்? என போலீசார் நடத்திய விசாரணையில் பல திடுக்கிடும் தகவல்கள் வெளியானது. டிரைவர் வேலை பார்த்து வந்த பிரகாஷிற்கு திருமணமாகி இரண்டு குழந்தைகள் உள்ளனர். கடந்த நான்கு வருடத்திற்கு முன்பு, பிரகாஷின் மனைவி இதய நோயால் அவதிப்பட்டவந்தபோது, அவர் பொன்னேரி அரசு மருத்துவமனையில் சிகிச்சை பெற்று வந்துள்ளார். அப்போது, பிரகாஷிற்கும், ஏற்கனவே திருமணமாகி குழந்தைகள் இருக்கும் மருத்துவமனையில் கணினி ஆபரேட்டர் ராஜேஸ்வரிக்கும் பழக்கம் ஏற்பட்டுள்ளது. "பேசவில்லை என்றால் எரித்து விடுவேன்" பின்னர், பிரகாஷின் மனைவி இதய நோயால் உயிரிழந்துள்ளார். இதனை தொடர்ந்து, பிரகாஷும், ராஜேஸ்வரியும் திருமணத்தை மீறிய உறவில் இருந்து வந்ததாக சொல்லப்படுகிறது. இந்நிலையில், கடந்த ஒரு வருடமாக ராஜேஸ்வரி, பிரகாஷுடன் பழகுவதை தவிர்த்து வந்துள்ளார். இதனால் கோபமடைந்த பிரகாஷ் ஏற்கனவே தொலைபேசியில் பேசும்போது "என்னிடம் பேசவில்லை என்றால் உன்னை எரித்து விடுவேன்" என கூறி மிரட்டியதாக சொல்லப்படுகிறது. மருத்துவமனையில் மாலையில் பணியில் இருந்த ராஜேஸ்வரியை தொலைபேசி மூலம் அழைத்து வெளியே வர சொல்லியுள்ளார் பிரகாஷ். இதையடுத்து வெளியே வந்த ராஜேஸ்வரியிடம் பேசிய போது, ராஜேஸ்வரி "எனக்கு உன்னிடம் பேச விருப்பம் இல்லை , இனிமேல் என்னிடம் பேச வேண்டாம்" என கூறியதாக சொல்லப்படுகிறது. அப்போது ஆத்திரத்தில் பெட்ரோல் ஊற்றி எரித்தது தெரியவந்துள்ளது.