காவிரி நீர்ப்பிடிப்புப் பகுதிகளில் தொடர்ந்து மழை பெய்து வருவதால், கர்நாடகாவில் உள்ள அணைகளில் இருந்து தமிழகத்தை நோக்கி திறக்கப்படும் உபரி நீரின் அளவு அதிகரித்துள்ளது. குறிப்பாக, கபினி அணையில் இருந்து தமிழகத்திற்கு வரும் காவிரியில் நீர் திறப்பு அதிகரிக்கப்பட்டுள்ளது. நீர்ப்பிடிப்புப் பகுதிகளில் பெய்து வரும் தொடர் மழையின் காரணமாக கர்நாடக அணைகளுக்கு நீர்வரத்து அதிகரித்துள்ள நிலையில், அணைகளில் இருந்து உபரி நீர் திறப்பும் அதிகரிக்கப்பட்டுள்ளது. இதன் காரணமாக, ஒகேனக்கல் காவிரியாற்றில் நீர்வரத்து தொடர்ந்து உயர்ந்து வருகிறது. நேற்று மாலை விநாடிக்கு 6,500 கனஅடியாக இருந்த நீர்வரத்து, இன்று காலை நிலவரப்படி 10,000 கனஅடியாக அதிகரித்துள்ளது. ஒகேனக்கல்லில் நீர்வரத்து அதிகரிப்பு காவிரியில் நீர்வரத்து 10,000 கனஅடியாக அதிகரித்துள்ள நிலையில், ஒகேனக்கல் அருவிகளில் சுற்றுலாப் பயணிகள் நீராட அனுமதி வழங்கப்பட்டுள்ளது. அதே நேரத்தில், நீர்வரத்து அதிகரித்துள்ளதால் பாதுகாப்பு காரணங்களுக்காக பரிசல் இயக்க தடை தொடர்ந்து நீடிக்கிறது. இன்றுடன் 15-ஆவது நாளாக ஒகேனக்கல் காவிரியாற்றில் பரிசல்களை இயக்கத் தடை விதிக்கப்பட்டுள்ளது. மேட்டூர் அணைக்கு நீர்வரத்து அதிகரிப்பு மேட்டூர் அணைக்கும் நீர்வரத்து அதிகரித்துள்ளது. மேட்டூர் அணைக்கு தற்போது விநாடிக்கு 7,000 கனஅடி தண்ணீர் வந்து கொண்டிருக்கிறது. நீர்வரத்து அதிகரித்ததன் காரணமாக மேட்டூர் அணையின் நீர்மட்டம் 90 அடியைத் தாண்டியுள்ளது. இதனிடையே, குடிநீர் தேவைக்காக மேட்டூர் அணையில் இருந்து விநாடிக்கு 2,000 கனஅடி தண்ணீர் திறக்கப்பட்டு வருகிறது. காவிரி நீர்ப்பிடிப்புப் பகுதிகளில் மழை தொடர்ந்து நீடிக்கும் பட்சத்தில், கர்நாடக அணைகளில் இருந்து தமிழகத்திற்கு வரும் நீரின் அளவு மேலும் அதிகரிக்க வாய்ப்புள்ளதாக எதிர்பார்க்கப்படுகிறது.