நடிகை அம்பிகா மற்றும் அவரது சகோதரர் மீது ரூ.46 கோடி காசோலை மோசடி செய்ததாக நடிகை ராதா புகார் அளித்துள்ளார். தமிழ் திரையுலகின் மூத்த நடிகைகளான அம்பிகா மற்றும் ராதா சகோதரிகள் ஆவர். இந்நிலையில், தனது மூத்த சகோதரியும் நடிகையுமான அம்பிகா மற்றும் அவரது சகோதரர் மீது நடிகை ராதா சென்னை காவல் ஆணையர் அலுவலகத்தில் புகார் அளித்துள்ளார். ரூ.46 கோடி மதிப்பிலான காசோலை தொடர்பாக மோசடி நடைபெற்றதாக தனது புகாரில் ராதா குற்றம்சாட்டியுள்ளதாக கூறப்படுகிறது. இந்த விவகாரம் தொடர்பாக வழக்கறிஞர் பால் கனகராஜ் உள்ளிட்டோருடன் சென்னை காவல்துறை ஆணையர் அலுவலகத்திற்கு நடிகை ராதா நேரில் வந்து புகார் அளித்தார். புகாரின் அடிப்படையில் காவல்துறையினர் விசாரணை மேற்கொண்டு, சம்பந்தப்பட்ட விவகாரம் குறித்து அடுத்தகட்ட நடவடிக்கை எடுப்பார்கள் என எதிர்பார்க்கப்படுகிறது.