செங்கல்பட்டு–தாம்பரம் ஜி.எஸ்.டி. சாலையில், மறைமலைநகர் நகராட்சி அலுவலகம் அருகே பத்மாவதி நடந்து சென்று கொண்டிருந்தார். அப்போது அந்த வழியாக வந்த யூடியூபர் இர்பானின் விலையுயர்ந்த சொகுசு கார், பத்மாவதி மீது மோதி பரிதாபமாக உயிரிழந்தார். கடந்த 2023 ஆம் ஆண்டு மே 25 ஆம் தேதி இரவு 8.30 மணியளவில், நடந்த இச்சம்பவம் ‘பிராப்ள’ யூட்யூபர் முகமது இர்ஃபானுக்கு எதிராக மற்றொரு பிராப்ளமாக மாறியது. பல்வேறு குற்றச்சாட்டுகளும் இணையத்தில் பரவின. அதேநேரம், அதி வேகமாக வந்து விபத்து ஏற்படுத்தியதாக சென்னை சித்தாலப்பாக்கத்தை சேர்ந்த கார் ஓட்டுநரான அசாருதீன் (34) மீது வழக்கு பதிவு செய்து விபத்து ஏற்படுத்திய சொகுசு காரை காவல் நிலையம் எடுத்து சென்று விசாரணை மேற்கொண்டனர். இந்த விபத்து கார் ஓட்டுநரின் கவனக்குறைவான மற்றும் அஜாக்கிரதையான வாகன ஓட்டுதலால் ஏற்பட்டதாக தீர்ப்பாயம் முடிவு செய்தது. ஆனால், உயிரிழந்தவர் சாலையை கவனக்குறைவாக கடக்க முயன்றதால் விபத்து ஏற்பட்டதாக காப்பீட்டு நிறுவனம் தரப்பில் வாதிடப்பட்ட போதிலும், அதனை உறுதிப்படுத்தும் ஆதாரம் இல்லை என நீதிமன்றம் குறிப்பிட்டது. இந்நிலையில், இழப்பீட்டு உரிமை, சொத்து இழப்பு, இறுதிச்சடங்கு செலவு என மொத்தமாக 30 லட்சத்து 69 ஆயிரம் ரூபாய் இழப்பீடு வழங்க தீர்ப்பாயம் உத்தரவிட்டுள்ளது. இந்தத் தொகைக்கு, மனு தாக்கல் செய்யப்பட்ட 2023 ஆகஸ்ட் 1 ஆம் தேதி முதல், தொகை செலுத்தப்படும் நாள் வரை ஆண்டுக்கு 7.5 சதவீத வட்டி வழங்கவும் உத்தரவிடப்பட்டுள்ளது. இழப்பீட்டுத் தொகையில், உயிரிழந்த பத்மாவதியின் மகன் பிரகாஷ் மற்றும் மகள் ஷீலா ஆகியோருக்கு தலா 13 லட்ச ரூபாயும், அவரது தாயார் தனபாக்கியத்துக்கு 4 லட்சத்து 69 ஆயிரம் ரூபாயும், அதற்கான வட்டியுடன் வழங்க உத்தரவிடப்பட்டுள்ளது. மேலும், காப்பீட்டு நிறுவனம் முதலில் இழப்பீட்டுத் தொகையை செலுத்திவிட்டு, பின்னர் வாகனத்தின் உரிமையாளரிடமிருந்து அந்தத் தொகையை வட்டி மற்றும் செலவுகளுடன் வசூலித்துக் கொள்ளலாம் என்றும் தீர்ப்பாயம் உத்தரவிட்டுள்ளது. இதன்மூலம், பிராப்ள யூட்யூபர் இர்ஃபான் முகமதுவின் கார் அலட்சியமாக ஓட்டப்பட்டிருந்தால், காப்பீட்டு நிறுவனம் இர்ஃபான் மீது வழக்கு தொடர்ந்து அதனை அவரிடமிருந்து வசூலிக்கும் என தகவல் வெளியாகியுள்ளது. அதாவது, போக்குவரத்து விதிகளை மீறி அதிவேகமாக அந்த கார் ஓட்டப்பட்டதா? உள்ளே பாடல்கள் ஒலிக்கப்பட்டு ஓட்டப்பட்டதா? செல்போன் பேசியபடி ஓட்டப்பட்டதா? இப்படி கவனக்குறைவாக அல்லது அலட்சியமாக வாகனம் ஓட்டுதல் கண்டுபிடிக்கப்பட்டால், இர்ஃபானுக்கு கூடுதல் நெருக்கடியாக மாறும் என கூறப்படுகிறது. அதேபோல், காப்பீட்டு நிறுவனத்துக்கு கூடுதல் தொகையும் செலுத்தவேண்டியிருக்கும் எனவும் கூறப்படுகிறது. 2024 ஆம் ஆண்டில், இர்ஃபான் தனது மனைவியின் கருவிலுள்ள சிசுவின் பாலினத்தை துபாயில் பரிசோதனை செய்து, அந்த முடிவை வீடியோவாகத் தனது யூடியூப் பக்கத்தில் வெளியிட்டார். இது தொடர்பாக தமிழ்நாடு சுகாதாரத் துறை இவருக்கு விளக்கம் கேட்டு நோட்டீஸ் அனுப்பியது. இந்த விவகாரம் தொடர்பாக சென்னை உயர் நீதிமன்றத்திலும் வழக்குத் தொடரப்பட்டு விசாரணை நடைபெற்று வருகிறது.