மதுரை மீனாட்சி அம்மன் கோவில் குடமுழுக்கு: விழாக்கோலம் பூண்ட மதுரை 17 ஆண்டுகளுக்குப் பிறகு மதுரை மீனாட்சி அம்மன் கோவிலில் நாளை மறுநாள் குடமுழுக்கு விழா நடைபெற உள்ள நிலையில், மதுரை மாநகரமே விழாக்கோலம் பூண்டுள்ளது. குடமுழுக்கு விழாவை முன்னிட்டு கோவில் மற்றும் சுற்றுவட்டாரப் பகுதிகளில் பல்வேறு சிறப்பு ஏற்பாடுகள் செய்யப்பட்டுள்ளன. குடமுழுக்கு விழாவுக்கான யாகசாலை பூஜைகள் தொடர்ந்து நடைபெற்று வருகின்றன. இன்று காலை 8.30 மணிக்கு தொடங்கிய எட்டாம் கால யாகசாலை பூஜை, காலை 11.30 மணி வரை நடைபெற்றது. இதனைத் தொடர்ந்து அடுத்தடுத்த கால பூஜைகளும் சிறப்பு வழிபாடுகளும் நடைபெற உள்ளன. பாதுகாப்பு மற்றும் அடிப்படை வசதிகள் குறித்து ஆய்வு மீனாட்சி அம்மன் கோவில் கும்பாபிஷேகத்திற்காக நியமிக்கப்பட்ட 3 ஐஏஎஸ் அதிகாரிகள், மதுரை மாவட்ட ஆட்சியருடன் ஆலோசனை மேற்கொண்டனர். குடமுழுக்கு விழாவிற்கு வரும் பக்தர்களின் பாதுகாப்பு, குடிநீர், கழிவறை உள்ளிட்ட அடிப்படை வசதிகள் மற்றும் போக்குவரத்து மாற்றங்கள் குறித்து அதிகாரிகள் ஆய்வு செய்தனர். பெருமளவில் பக்தர்கள் வருகை தருவார்கள் என எதிர்பார்க்கப்படுவதால், கூட்ட நெரிசலை கட்டுப்படுத்தவும், பக்தர்களுக்கு தேவையான வசதிகளை ஏற்படுத்தவும் அதிகாரிகள் பல்வேறு நடவடிக்கைகளை மேற்கொண்டு வருகின்றனர். 5 டன் மலர்கள் வருகை குடமுழுக்கு விழாவை முன்னிட்டு மீனாட்சி அம்மன் கோவில் சிறப்பு அலங்காரங்களுக்காக சுமார் 5 டன் மலர்கள் கொண்டு வரப்பப்ட்டுள்ளன. வெளிநாடுகள், வெளிமாநிலங்கள் மற்றும் உள்ளூர் பகுதிகளில் இருந்து பல்வேறு வகையான மலர்கள் கொண்டு வரப்பட்டுள்ளன. கோவில் வளாகம் முழுவதும் மலர் அலங்காரம் உள்ளிட்ட சிறப்பு ஏற்பாடுகள் செய்யப்பட்டு வருவதால், விழா களைகட்டியுள்ளது. 6,500 போலீஸார் பாதுகாப்பு குடமுழுக்கு விழாவையொட்டி மதுரையில் பலத்த பாதுகாப்பு ஏற்பாடுகள் செய்யப்பட்டுள்ளன. பக்தர்கள் அதிகளவில் திரள்வார்கள் என்பதால் சுமார் 6,500 போலீஸார் பாதுகாப்புப் பணியில் ஈடுபடுத்தப்பட உள்ளனர். கோவில் வளாகம், முக்கிய சாலைகள், பக்தர்கள் கூடும் இடங்கள் உள்ளிட்ட பகுதிகளில் போலீஸார் கண்காணிப்புப் பணியில் ஈடுபட உள்ளனர். போக்குவரத்து நெரிசலை தவிர்க்க தேவையான இடங்களில் போக்குவரத்து மாற்றங்களும் மேற்கொள்ளப்பட உள்ளன. 17 ஆண்டுகளுக்குப் பிறகு நடைபெற உள்ள மீனாட்சி அம்மன் கோவில் குடமுழுக்கு விழாவை முன்னிட்டு மதுரை மாநகரமே ஆன்மிக விழாக்கோலம் பூண்டுள்ளது.