ஒரே ஆண்டில் தொடர்ந்து 200 கோடி ரூபாய் வசூல் செய்த படங்களின் மூலம் சாதனை படைத்த, ஒரே இந்திய நடிகை என்ற பெருமையை இளம் வயதிலேயே மமிதா பைஜு பெற்றுள்ளதாக, சமூக வலைதளங்களில் வைரலாகி வருகிறது. 2017-ல் 'சர்வோபரி பலக்காரன்'((Sarvopari Palakkaran)) காதல் நகைச்சுவை திரைப்படத்தின் மூலம் நடிகையாக அறிமுகமானார் மமிதா பைஜு. இதனைத் தொடர்ந்து, 'ஆபரேஷன் ஜாவா' (2021) , 'கோ கோ' (2021) , 'சூப்பர் ஷரண்யா ' (2022), மற்றும் 'பிரணய விலாசம்' (2023) போன்ற மலையாள திரைப்படங்களில் தொடர்ந்து நடித்திருந்தாலும், 2024-ஆம் ஆண்டின் பிளாக்பஸ்டர் காதல் நகைச்சுவைத் திரைப்படமான 'பிரேமலு' வெற்றிதான் இவருக்குத் தமிழிலும் மிகப்பெரிய ரசிகர்களின் ராஜ்ஜியத்தை உருவாக்கி புகழின் உச்சிக்குச் சென்ற து. இதனைத் தொடர்ந்து, அவரது திரைப்பயணம் அதிவேகம் எடுக்க ஆரம்பித்தது. தமிழில் பிரதீப் ரங்கநாதனுடன் ‘டியூட்’ திரைப்படத்தில் நடித்து வெற்றி பெற்று தமிழ் ரசிகர்களின் தவிர்க்க முடியாத நாயகியாக உருவெடுத்தார். மேலும், நடிகர் தனுஷுடன் நடித்த ‘கர’ எதிர்பார்த்த வெற்றியைப் பெறவில்லை. தொடர்ந்து, முதல்வர் விஜய்யின் கடைசி படமான ‘ஜன நாயகன்’ படத்தின் முக்கிய கதாப்பாத்திரமான, வளர்ப்பு மகளாக நடித்தார். இது, உலகளாவிய வசூலாக 300 கோடி ரூபாயை தாண்டியதாக கூறப்படுகிறது. 'விஸ்வநாத் அண்ட் சன்ஸ்' திரைப்படத்தில் சூர்யாவுக்கு ஜோடியாகவும் அவர் நடித்திருந்தார் . தமிழ் -தெலுங்கு இருமொழித் திரைப்படமான இது, திரையரங்குகளில் வெளியானபோது 200 கோடி ரூபாய் வசூலைக் கடந்ததாக கூறப்பட்டது. இதனைத் தொடர்ந்து, மமிதா பைஜு சமீபத்தில் நிவின் பாலிக்கு ஜோடியாக நடித்து வெளியான 'பெத்லகேம் குடும்ப யூனிட்' மலையாள திரைப்படம் வெறும் 11 நாட்களில் 200 கோடி ரூபாய் வசூல் செய்த படங்களின் பட்டியலில் இணைந்துள்ளது. திரையுலக அறிக்கைகளின்படி, கிரிஷ் ஏ.டி இயக்கிய இந்த காதல் நகைச்சுவைப் படம் உலகளவில் சுமார் 205 கோடி ரூபாய் வசூலித்துள்ளதாக தகவல் வெளியாகியுள்ளது. மலையாளத் திரையுலகில் மமிதா பைஜு ஒப்பீட்டளவில் இளம் வயது நாயகி என்பதால், இந்தச் சாதனை தனித்துவம் பெற்றுள்ளது, என பேசப்பட்டு வருகிறது. ஒரே ஆண்டில் மூன்று ரூ. 200 கோடி வசூல் படங்களில் நடித்த நடிகை என்ற ஹாட்ரிக் சாதனையையும் அவர் படைத்துள்ளார். இதனால், ரசிகர்கள் மத்தியில் "MAMITHA BAIJU ERA" என்ற பேச்சும் சமூக வலைதளங்களில் கவனம் பெற்று வருகிறது. இந்த நிலையில், நடிகை மமிதா பைஜு அடுத்ததாக துல்கர் சல்மானுக்கு ஜோடியாக நடிக்க உள்ளதாக தகவல் வெளியாகி உள்ளது. அதாவது, ஃபகத் ஃபாசில் நடித்த 'ஆவேஷம்' ஹிட் படத்தைக் கொடுத்த ஜீத்து மாதவன் இயக்கத்தில் துல்கர் சல்மான் நடிக்க உள்ள படத்தில் மமிதா பைஜு நடிக்க வைக்க பேச்சுவார்த்தை நடப்பதாக தகவல் வெளியாகியுள்ளது. ஜீத்து மாதவன் தற்போது சூர்யா படத்தை இயக்கி வருகிறார். விரைவில் துல்கர் சல்மானுடன் மமிதா பைஜு நாயகியாக நடிப்பது குறித்த அதிகாரப்பூர்வ அறிவிப்பு வெளியாகும் என எதிர்பார்க்கப்படுகிறது. குறிப்பாக, “தொட்டதெல்லாம் ஹிட்” என மமிதா பைஜுவின் திரையுலக வளர்ச்சி மிகவும் வேகமாக இருப்பதால், தென்னிந்திய சினிமாவில் கமர்ஷியலாக மிகவும் வெற்றிகரமான நாயகிகளில் ஒருவராக பாராட்டப்பட்டு வருகிறார். மேலும், மலையாளத் திரையுலக ஜாம்பவான்களான மோகன்லால் மற்றும் மம்மூட்டி ஆகியோரின் பெயர்களின் முதலெழுத்துக்களுடன் ஒப்பிட்டு, இவரை புதிய 'எம்' என்று குறிப்பிடத் தொடங்கியிருப்பதாகவும் கூறப்படுகிறது.