விடுதலை சிறுத்தை கட்சியின் தலைவர் திருமா, அண்மையில் செம்பரம்பாக்கத்தில் உள்ள ஈவிபி (EVP) பிலிம் சிட்டியில் நடைபெற்ற தனியார் நிகழ்ச்சி ஒன்றில் பங்கேற்பதற்காக கோட் அணிந்தபடி காரில் சென்றார். அப்போது அந்த கார் பலரது கவனத்தையும் ஈர்த்ததோடு விவாதத்தையும் உருவாக்கியது. திருமா பயணித்த காரின் பதிவெண் 'TN 07 CM 2031' என இருந்தது. இதற்கு முன்பு, விஜய் 'GOAT' திரைப்படத்தில் நடித்தபோது, விஜய் செல்லும் காரின் பதிவெண் 'CM 2026' என இருக்கும். இதனை கவனித்த பலரும், விஜய் 2026ல் CM ஆகப்போவதை தான் இயக்குனர் வெங்கட்பிரபு சூசகமாக சொல்லியிருக்கிறார், 'அன்றே கணித்தார் வெங்கட்பிரபு' என பதிவிட்டு வந்தனர். சில நாட்களுக்கு முன்பு கூட இயக்குனர் வெங்கட்பிரபு முதலமைச்சரை சந்தித்தபோது 'GOAT' படத்தில் வந்த காரின் பதிவெண்ணை பரிசளித்தார். இதே போல திருமா, 2031ல் CM என்பதை சொல்லாமல் சொல்கிறாரோ என்ற கேள்வி பலருக்கும் எழுந்துள்ளது. இந்த புகைப்படத்தையும், வீடியோவையும் விசிக ஆதரவாளர்கள் பலரும் மகிழ்ச்சியோடு பகிர்ந்து வந்தனர். இந்நிலையில், நெட்டிசன்கள் அந்த பதிவெண்ணை வைத்து அலசி ஆரம்பித்தபோது தான் பல அதிர்ச்சி தகவல்கள் வெளியானது. முதலில் 'TN 07 CM 2031' என்ற பதிவெண் காருடையது இல்லை, அது ஹோண்டா dio ஸ்கூட்டர் வாகனம் என தெரியவந்துள்ளது. அடுத்த அதிர்ச்சி என்னவென்றால், அந்த பதிவெண்ணை வைத்திருக்கும் வாகனத்திற்கு, ஹெல்மெட் அணியாதது, தவறான பாதையில் சென்றது ஆகியவற்றிற்கு அபராதம் போடப்பட்டுள்ளதும் தெரியவந்துள்ளது. வீடியோவில் திருமா பயணித்த காரின் பின்பக்கம் ஜாகுவார் கார் போல இருந்த நிலையில், வெளியான புகைப்படத்தில் காரின் முன் பகுதியில் டெஸ்லா குறியீடு இருந்ததால், 'அதெப்படி திமிங்கலம்' என பலரையும் யோசிக்க வைத்துள்ளது. காரின் முன் பகுதியில் டெஸ்லா குறியீடு இருக்கும் புகைப்படம் AIயால் எடிட் செய்யப்பட்ட புகைப்படமாக இருக்கலாம் என்றும் கருத்து தெரிவித்து வருகின்றனர். காரில் கெத்தாக வலம் வந்த வீடியோ வைரலான நிலையில், தற்போது காரின் பதிவெண் போலியானது தெரியவந்ததால் "என்னங்க சிவாஜி கடைசியில இப்படி ஆகிருச்சே" என நெட்டிசன்கள் மீம்ஸ் போட்டு வருகின்றனர்.