தூத்துக்குடி மாவட்டம், எட்டையபுரம் தமிழக வெற்றிக்கழக நகரச் செயலாளர் பதவியில் இருப்பவர் GDC கனகராஜ் (25). இவரது தம்பி கார்த்திக்(18), அப்பகுதியில் உள்ள மாற்று சமுதாய இளம்பெண் ஒருவரை தினமும் பின்தொடர்ந்து, தனது என்ஃபீல்ட் புல்லட் பைக் வாகனத்தில், அந்த இளம்பெண்ணை பார்த்தால்,ரேசிங் செய்வது, அதிக சத்தத்தில் விடாமல் ஹாரன் அடிப்பது, சில நேரங்களில் வீட்டு வாசலில் நின்று தொந்தரவு செய்வது உள்ளிட்ட பல்வேறு தொந்தரவுகளை செய்து அப்பெண்ணிற்கு மன உளைச்சலை ஏற்படுத்தி வந்ததாகக் கூறப்படுகிறது. இதுகுறித்து அந்த இளம்பெண், தனது குடும்பத்தினரிடம் நடந்தவற்றை கூறியுள்ளார். இதனால், அந்த இளம்பெண்ணின் குடும்பத்தார், கடந்த 15 ஆம் தேதி செவ்வாய்க்கிழமை இரவு கார்த்திக்கை சத்தம் போட்டு உள்ளனர். இதில், ஆத்திரமடைந்த கார்த்திக், அவரது அண்ணன் கனகராஜ், விடுதலை சிறுத்தை கட்சியின் முன்னாள் மாவட்ட செயலாளரும் தற்போதைய நிர்வாகியுமான மோட்சம், கனகராஜின் தந்தையான திமுக நிர்வாகி சின்னப்பர் உள்ளிட்டோர், அந்த இளம் பெண்ணின் வீட்டிற்கு கையில் அரிவாளுடன் சென்று, கொலை முயற்சி தாக்குதலில் ஈடுபட முயன்றதாகக் கூறப்படுகிறது. இதனை அடுத்து எட்டையாபுரம் காவல் நிலைய போலீசார் அங்கு வந்து கார்த்திக்கிடமிருந்த அரிவாளை பிடுங்கி, இருதரப்பையும் சமாதானம் படுத்தினர். இதனைத் தொடர்ந்து அந்த வீடியோ தற்போது சமூக வலைதளங்களில் வைரலான நிலையில், எட்டையபுரம் தமிழக வெற்றிக்கழக நகரச்செயலாளர் கனகராஜ் (25), கார்த்திக்(18), விடுதலை சிறுத்தை கட்சி நிர்வாகி மோட்சம் (48), திமுக நிர்வாகி சின்னப்பர், மற்றும் 18 வயது கீழ் உள்ள இரண்டு சிறார்கள் மீது 5 பிரிவுகளின் கீழ் வழக்குப்பதிவு செய்தனர். அதேபோல், இளம் பெண்ணின் குடும்பத்தாரான அருண்குமார் (25), மோகன்(30), தமிழ்வண்ணன் மற்றும் 50 வயதுடைய இரண்டு பெண்கள், மற்றொரு நபர் உள்ளிட்ட ஆறு பேர் மீது எதிர் தரப்பை மிரட்டியதாக வழக்குப் பதிவு செய்துள்ளனர். மேலும், பெயில் எடுத்தாலும் உங்களை அரெஸ்ட் செய்வோம் என எதிர் தரப்பினருக்கு சப்போர்ட் செய்து போலீஸார், மிரட்டிவருவதாகவும் குற்றச்சாட்டு எழுந்துள்ளது. இதில், தமிழக வெற்றி கழக நிர்வாகி கனகராஜ் குடும்பத்தைச் சேர்ந்த இரண்டு சிறார்கள் கைது செய்யப்பட்டுள்ளனர். ஆனால், கனகராஜ், கார்த்திக், மோட்சம், சின்னப்பர் உள்ளிட்ட நான்கு பேர் தற்போது வரை தலைமறைவாக உள்ளதாக போலீஸார் தெரிவித்துவருகின்றனர். அதேபோல், வழக்குப்பதிவு செய்யப்பட்டுள்ள இளம்பெண் குடும்பத்தாரும் சிலர் தலைமறைவாக இருப்பதாக என காவல்துறையினர் கூறிவரும் நிலையில், விடுதலை சிறுத்தைகட்சி நிர்வாகியான மோட்சம் என்பவர் அப்பகுதியில் சுதந்திரமாக சுற்றி வருவதாகவும் அப்பகுதி பொதுமக்கள் குற்றம்சாட்டி வருகின்றனர். தமிழக வெற்றி கழக நகரச்செயலாளர் கனகராஜ் தந்தையான திமுக சின்னப்பர் கடந்தாண்டு ஒரு இளம் பெண்ணுக்கு செவிலியர் வேலை வாங்கித் தருவதாக மோசடி புகார் அவர் மீது புகார் எழுந்து சர்ச்சையானது குறிப்பிடத்தக்கதாகும். இதுகுறித்து, எட்டயபுரம் போலீஸாரிடம் கேட்டபோது, புகார்தாரர்கள் மிரட்டியதாக கார்த்திக் தரப்பு அளித்த புகாரின் பேரில் வழக்குப்பதிவு செய்யப்பட்டுள்ளது. அவர்களை போலீஸ் தரப்பிலிருந்து மிரட்டவில்லை. மோட்சம் சென்னையில் இருப்பதாக டவர் காண்பிக்கிறது. விரைவில் சம்பந்தப்பட்டவர்களை கைது செய்வோம் என தெரிவித்துள்ளனர்.