''சாஸ்த்ரா பல்கலை. விவகாரத்தில் ஆக்கிரமிப்பு நிலத்துக்கு பதில் வேறு நிலத்தை ஏன் பெறக்கூடாது?" - தமிழக அரசுக்கு உச்ச நீதிமன்றம் கேள்வி

தஞ்சாவூர் சாஸ்த்ரா பல்கலைக்கழகம் ஆக்கிரமித்துள்ளதாகக் கூறப்படும் 31.37 ஏக்கர் நிலத்திற்குப் பதிலாக வேறு நிலத்தைப் பெற்றுக்கொள்வது குறித்து தமிழக அரசு பரிசீலிக்கக் கூடாதா? என்று உச்சநீதிமன்றம் கேள்வி எழுப்பியுள்ளது. தஞ்சாவூர் திருமலைசமுத்திரத்தில் திறந்தவெளி சிறைச்சாலைக்கு ஒதுக்கப்பட்டிருந்த 31.37 ஏக்கர் தரிசு நிலத்தை சாஸ்த்ரா பல்கலைக்கழகம் ஆக்கிரமித்துக் கட்டிடங்களை கட்டியதாகக் கூறி, நிலத்தை மீட்க சென்னை உயர்நீதிமன்றம் கடந்த ஜனவரியில் உத்தரவிட்டது. இதனை எதிர்த்து சாஸ்த்ரா பல்கலைக்கழகம் உச்சநீதிமன்றத்தில் மேல்முறையீடு செய்த நிலையில், உயர்நீதிமன்ற உத்தரவுக்கு இடைக்காலத் தடை விதிக்கப்பட்டு விசாரணை நடைபெறுகிறது. விசாரணையின்போது சாஸ்த்ரா தரப்பில், ஆக்கிரமிக்கப்பட்டதாகக் கூறப்படும் நிலத்திற்குப் பதிலாக 5 கிலோமீட்டர் தொலைவில் உள்ள பல்கலைக்கழக நிலத்தை வழங்கவோ அல்லது சந்தை மதிப்பிலான தொகையைச் செலுத்தவோ பல்கலைக்கழகம் தயாராக உள்ளதாக தெரிவிக்கப்பட்டது. இதற்கு தமிழக அரசு, 1985 முதல் சிறிது சிறிதாக அரசு நிலம் ஆக்கிரமிக்கப்பட்டதாகவும், நில ஆக்கிரமிப்பை அனுமதிக்க முடியாது என்றும் தெரிவிக்கப்பட்டது.