அமைச்சர் கீர்த்தனா 4 நாட்களிலேயே பணிக்கு திரும்பினார்: தவெக எம்.எல்.ஏ கனிமொழி அமைச்சர் கீர்த்தனா காலர்போன் அறுவை சிகிச்சைக்குப் பிறகு, மருத்துவர்கள் 20 நாட்கள் ஓய்வெடுக்க அறிவுறுத்தியிருந்த நிலையில், 4 நாட்களிலேயே பணிக்குத் திரும்பியதாக தவெக எம்.எல்.ஏ கனிமொழி தெரிவித்துள்ளார். இதுதொடர்பாக அவர் வெளியிட்டுள்ள பதிவில், காமாட்சி மருத்துவமனையில் அமைச்சர் கீர்த்தனாவை சந்தித்ததாகவும், மருத்துவமனையில் இருந்தபோதும் முதலமைச்சரின் லண்டன் பயணத்துக்கான ஏற்பாடுகளை ஒருங்கிணைத்து வந்ததாகவும் குறிப்பிட்டுள்ளார். மேலும், உடல்நிலை குறித்து அமைச்சர் ஆதவ் சார் தெரிவித்தபோது, எதிர்க்கட்சியினர் அவரது உடல்நிலை மற்றும் ஓய்வு குறித்து கேள்வி எழுப்பாமல், மாதவிடாய் தொடர்பாகவே கருத்துகளை முன்வைத்ததாக கனிமொழி விமர்சித்துள்ளார். பெண்களின் உடல்நிலையை அவர்களது மாதவிடாய் சுழற்சியுடன் மட்டுமே தொடர்புபடுத்திப் பார்ப்பது பிற்போக்குத்தனமான மனநிலை எனக் குறிப்பிட்டுள்ள அவர், பெண்கள் தங்களது உடல்நலப் பிரச்சினைகள், காயங்கள் மற்றும் பணிச்சுமைகளுக்கு மத்தியிலும் தலைமைப் பொறுப்புகளை தொடர்ந்து மேற்கொண்டு வருவதாக தெரிவித்துள்ளார். அறுவை சிகிச்சைக்கு 4 நாட்களுக்குப் பிறகும், வலி நிவாரணி மருந்துகளை எடுத்துக்கொண்டும், கட்டுடன் இருந்த நிலையிலும் அமைச்சர் கீர்த்தனா நிறுவனங்களைச் சந்தித்து தொடர்ச்சியாக புரிந்துணர்வு ஒப்பந்தங்களில் கையெழுத்திட்டதாகவும் கனிமொழி தெரிவித்துள்ளார். பெண்களின் உடல்நிலையை விமர்சிப்பதை விட, கடினமான சூழல்களிலும் தொடர்ந்து பணியாற்றும் பெண்களைப் பாராட்ட வேண்டும் என்றும் அவர் வலியுறுத்தியுள்ளார். மேலும், தனது பதிவை தனிப்பட்ட முறையில் வைத்திருக்க அமைச்சர் கீர்த்தனா விரும்பியதை அறிந்திருந்தும், இந்த விவகாரம் குறித்து பேச வேண்டிய கட்டாயம் ஏற்பட்டதாகக் கூறி கனிமொழி வருத்தம் தெரிவித்துள்ளார்.