சென்னையில், போக்குவரத்து வசதி, மழைநீர் வடிகால், நடைபாதை, தெருவிளக்குகள், சாலைப் பாதுகாப்பு உள்ளிட்ட பல்வேறு அம்சங்களை ஒருங்கிணைத்து சுமார் 80 கிலோமீட்டர் நீள சாலைகளை மேம்படுத்த மாநகராட்சி திட்டமிட்டுள்ளது. இது தொடர்பான விரிவான திட்ட அறிக்கை தயாரிக்கும் பணிக்கு 1 கோடியே 18 லட்சம் ரூபாய் ஒதுக்கப்பட்டுள்ளதாகத் தகவல் வெளியாகியுள்ளது. திட்டத்தின் முதற்கட்டமாக, பெரம்பூர்-வியாசர்பாடி, அம்பத்தூர் மற்றும் கிண்டி தொழிற்பேட்டை பகுதிகளில் மேம்பாட்டுப் பணிகள் மேற்கொள்ளப்பட உள்ளன. பெரம்பூர்-வியாசர்பாடி பகுதியில் 20 கிலோமீட்டர் நீள சாலைகளும், அம்பத்தூர் தொழிற்பேட்டையில் 40 கிலோமீட்டர் நீள சாலைகளும், கிண்டி தொழிற்பேட்டையில் 20 கிலோமீட்டர் நீள சாலைகளும் மேம்படுத்தப்பட உள்ளன.