பிக் பாஸ் நிகழ்ச்சியின் மூலம் பிரபலமடைந்தவர் நடிகை தாமரைச்செல்வி. இவர் தனியார் தொலைக்காட்சியில் ஒளிபரப்பாகும் பாரதி கண்ணம்மா, நினைத்தாலே இனிக்கும், சின்ன மருமகள் போன்ற சீரியல்களில் நடித்துள்ளார். தமிழக வெற்றிக் கழகத்தில் இணைந்த இவர், சட்டமன்ற தேர்தல் நேரத்தில் தவெகவிற்கு ஆதரவாக வாக்கு சேகரித்து அதனை வீடியோவாக இன்ஸ்டா பக்கத்தில் வெளியிட்டு வந்தார். நடிகை தாமரைச்செல்வி, 'Lotus Family' என்ற பெயரில் வீட்டு பொருட்களுக்கான Expoவை தமிழ்நாடு முழுவதும் நடத்தி வருகிறார். அண்மையில், தாமரை செல்வி, தான் தேர்தலின் போது அமைச்சர் அருண் ராஜ்க்கு ஆதரவாக வாக்கு கேட்டதாகவும், ஆனால் இப்போது கஷ்டப்படுவதாகவும் வீடியோ வெளியிட்டு பரபரப்பை ஏற்படுத்தினார். திருச்செங்கோடு பகுதியில் எக்ஸ்போ நடத்த திட்டமிட்ட நிலையில், அங்குள்ள பெரிய கடைக்காரர்கள் புகார் கொடுத்ததாக முதலில் போலீசார் அனுமதி அளிக்கவில்லை, பின்னர், நீதிமன்றம் சென்று அனுமதி வாங்கியும், கடைசி நேரத்தில் எக்ஸ்போ நடத்தவிடவில்லை என நடிகை தாமரை செல்வி வேதனையோடு தெரிவித்தார். தான் பிக்பாஸில் இருந்து வந்ததால் இப்படி செய்கிறார்களா? என்று நினைக்க தோன்றுகிறது எனவும் நடிகை தாமரை செல்வி கருத்து தெரிவித்தார். தனது இன்ஸ்டா பக்கத்தில் வெளியிட்ட வீடியோவில், அருண்ராஜ் சார்..தேர்தலின்போது உங்களுக்காகப் பிரச்சாரம் செய்திருக்கிறேன். தூங்கிக் கொண்டிருந்தவர்களைக்கூட எழுப்பி, அருண்ராஜ் சார் நல்லவர்,அவருக்கு வாக்களித்தால் மக்களுக்கு நல்லது செய்வார்’ என்று ஓட்டு கேட்டிருக்கிறேன். expoவிற்கு அருண்ராஜ் சார் நிச்சயமாக ஆதரவு கொடுப்பார், நிகழ்ச்சியை நடத்த உதவுவார் என்று முழுமையாக நம்பினோம் என தாமரை செல்வி வேதனையோடு பேசி வீடியோ வெளியிட்டார். இந்நிலையில், தமிழ்நாடு வணிகர் சங்க நாமக்கல் மாவட்ட தலைவர் ஜெயக்குமார் வெள்ளையன் செய்தியாளர்களை சந்தித்து பேசியபோது, சின்னத்திரை நடிகை தாமரைச்செல்வி அபாண்டமாக அமைச்சர் அருண்ராஜ் மீது குற்றம் சுமத்துகிறார்.எங்கள் பேரவையின் சார்பாக தான், புகார் கொடுத்து கண்காட்சிகள் நடத்தக் கூடாது என தெரிவித்திருந்தோம் என்று விளக்கம் அளித்தார். இனி வரும் காலங்களில் தமிழக அரசு மண்டபங்களில் கண்காட்சிகள் நடத்துவதற்கு அனுமதிக்க கூடாது. ஏனென்றால் சிறு குறு வியாபாரிகள் வியாபாரம் இல்லாமல் பாதிக்கப்படுகிறார்கள். ஆட்களுக்கான சம்பளம் கொடுத்து நாங்கள் வரி கட்டி நாங்கள் வியாபாரம் செய்கிறோம். ஆனால் இதுபோன்றவர்கள் எதுவும் செய்யாமல் மண்டபத்தை வாடகைக்கு எடுத்து ஒவ்வொருவரிடமும் 10 ஆயிரம் 15 ஆயிரம் பெற்று சம்பாதிக்கின்றனர். ஆகவே இதனை தடுத்து நிறுத்த வேண்டும் என்று தெரிவித்தார்.