திருச்சி மகாத்மா காந்தி அரசு மருத்துவமனையில் 68 வயது மூதாட்டி தமிழ்க்கொடியின் கால்விரலை எலி கடித்த சம்பவம் தொடர்பாக, திருச்சி மாவட்ட ஆட்சியர் மற்றும் மாநகராட்சி ஆணையர் இணைந்து மருத்துவமனையில் ஆய்வு மேற்கொள்ள உயர்நீதிமன்ற மதுரை அமர்வு உத்தரவிட்டுள்ளது. ஏழை மற்றும் எளிய மக்கள் அதிகம் பயன்பெறும் அரசு மருத்துவமனை முறையாக பராமரிக்கப்படவில்லை என்பதையே இந்த சம்பவம் காட்டுவதாகக் கூறி நீதிமன்றத்தில் மனு தாக்கல் செய்யப்பட்டது. மேலும், மருத்துவமனையில் கழிவறை, குடிநீர் உள்ளிட்ட அடிப்படை வசதிகள் முறையாக இல்லை என்றும் மனுவில் தெரிவிக்கப்பட்டது. நோயாளிகளின் பாதுகாப்பு, சுகாதாரம், தூய்மை மற்றும் மருத்துவமனையின் உள்கட்டமைப்பு தொடர்பாக நிரந்தர நடவடிக்கைகள் மேற்கொள்ள வேண்டும் என்றும் மனுதாரர் கோரிக்கை விடுத்திருந்தார். இந்த வழக்கை விசாரித்த நீதிபதிகள், திருச்சி மகாத்மா காந்தி அரசு மருத்துவமனையின் முதல்வர் உடனடியாக உரிய நடவடிக்கை எடுக்க அறிவுறுத்த வேண்டும் என உத்தரவிட்டனர். மேலும், எலி கடித்த சம்பவத்தில் பாதிக்கப்பட்டவருக்கு உரிய நிவாரணம் வழங்குவது குறித்து முடிவு செய்யவும் உத்தரவிட்டனர். இதனைத் தொடர்ந்து, திருச்சி மாவட்ட ஆட்சியர் மற்றும் மாநகராட்சி ஆணையர் ஆகியோர் இணைந்து அரசு மருத்துவமனையில் ஆய்வு மேற்கொண்டு, நோயாளிகளின் பாதுகாப்பு, சுகாதாரம் மற்றும் அடிப்படை வசதிகள் தொடர்பாக உரிய நடவடிக்கை எடுக்க வேண்டும் என உயர்நீதிமன்ற மதுரை அமர்வு உத்தரவிட்டுள்ளது.