சென்னை விமான நிலையத்தின் நிர்வாகத்தை விமான நிலையங்கள் ஆணையத்திடம் இருந்து மாற்ற வேண்டும் என முதலமைச்சர் விஜய் பிரதமருக்கு எழுதிய கடிதம் சிவில் விமான போக்குவரத்து அமைச்சகத்திற்கு பிரதமர் அலுவலகம் அனுப்பி வைத்திருப்பதாகவும், சிவில் விமான போக்குவரத்து அமைச்சகம் தரும் பதிலை பொறுத்தே அடுத்தக்கட்ட நடவடிக்கை இருக்கும் என தமிழக அரசு அதிகாரிகள் தெரிவித்துள்ளனர். விமான நிலைய நிர்வாகத்தை மாற்றக் கோரி முதலமைச்சர் எழுதிய கடிதமும் தற்போது வெளியாகியுள்ளது. அதில், தென்னிந்தியாவின் முக்கிய விமான நிலையமான சென்னை விமான நிலையம் பயணிகளின் தேவைகளையும் சர்வதேச முதலீட்டாளர்களின் எதிர்பார்ப்பையும் பூர்த்தி செய்ய தவறி வருவதாக குறிப்பிட்டுள்ளார். சென்னை சர்வதேச விமான நிலையத்தில் தற்போதைய பயணிகளின் எண்ணிக்கை ஆண்டிற்கு 2.70 கோடி எனவும், தற்போது நடந்து வரும் விரிவாக்க பணிகள் முடிந்த பிறகு இந்த எண்ணிக்கை 3.5 கோடியாக உயரும் என எதிர்பார்க்கப்படுகிறது. எனினும் இந்திய விமான நிலையங்கள் ஆணையத்தின் அறிக்கையின்படி, சென்னை விமான நிலையம் 2.30 கோடி பயணிகளை மட்டுமே கையாண்டுள்ளது. இந்த எண்ணிக்கை கொரோனா காலத்திற்கு முந்தைய வளர்ச்சியுடன் ஒப்பிடும் போது மிகக் குறைந்த அளவிலான வளர்ச்சி என முதலமைச்சர் விஜய் குறிப்பிட்டுள்ளார். பலவீனமான முனைய அணுகல், சீரமைக்கப்படாத டாக்ஸி சேவைகள், பராமரிக்கப்படாத கழிப்பறைகள், பயணிகள் அமரும் இடங்களில் தூய்மையின்மை, ஏர் - கண்டிஷனிங் அமைப்புகளில் ஏற்படும் தொடர் பிரச்சனை மற்றும் போதிய பார்க்கிங் வசதி இல்லாதது, இதுபோன்ற பல செயல்பாட்டுக் குறைபாடுகளை தொழில்துறை தலைவர்கள் அடிக்கடி சுட்டிக்காட்டவதாகவும் முதலமைச்சர் விஜய் தெரிவித்துள்ளார். கிடைக்கக்கூடிய திறனுக்கும் உண்மையான பயன்பாட்டிற்கும் மிகப் பெரிய இடைவெளி இருப்பதாக, பல செயல்பாட்டுக் குறைபாடுகளையும் சுட்டிக்காட்டியுள்ள முதலமைச்சர், இது தமிழ்நாடு மற்றும் இந்தியாவின் மீதான முதலீட்டுப் பார்வையை நேரடியாகப் பாதிக்கிறது எனவும் குறிப்பிட்டுள்ளார். முதலமைச்சர் அனுப்பியுள்ள இந்த கடிதத்திற்கு சிவில் விமான போக்குவரத்து அமைச்சகம் தரும் பதிலில் விமான நிலைய நிர்வாகத்தை மாற்றுவது தாமதமானால், புதிய விமான நிலையத்திற்கான தொழில் நுட்ப திட்ட அறிக்கை தயாரிக்கும் பணிகளை விரைவுபடுத்துவோம் என டிட்கோ அதிகாரிகள் தெரிவித்துள்ளனர்.