சாதி வாரி கணக்கெடுப்பிற்குப் பிறகு உத்தரப் பிரதேசம் நான்காக பிரிக்கப்படும் என அம்மாநில அமைச்சர் ஓம் பிரகாஷ் ராஜ்பார் தெரிவித்துள்ள கருத்தால் ஆளும் பா.ஜ.க.வின் கூட்டணி கட்சிகளுக்கு இடையே சலசலப்பு ஏற்பட்டுள்ளது. நாட்டின் அதிக மக்கள்தொகை கொண்ட மாநிலமான உத்தர பிரதேசத்தை பந்தேல்கண்ட், பூர்வாஞ்சல், அவத் பிரதேசம் மற்றும் பஸ்ஷிம் பிரதேசம் என பிரிக்க வேண்டும் என்று ஆளும் பா.ஜ.க.வின் கூட்டணியான SBSP கட்சியைச் சேர்ந்த ராஜ்பார் அவ்வப்போது கூறி வருகிறார். இதற்கு எதிர்ப்பு தெரிவித்துள்ள, அமைச்சரும் பா.ஜ.க.வின் மற்றொரு கூட்டணி கட்சியான நிஷாத் கட்சியின் தலைவருமான சஞ்சய் நிஷாத், ராஜ்பாரின் கருத்து மக்களை தவறாக வழிநடத்தும் வகையில் உள்ளதாகவும், அத்தகைய எந்தப் பிரிவினைக்கும் தனது கட்சி ஆதரவாக இல்லை என்றும் குறிப்பிட்டார். எனினும் மாநிலத்தை பிரிப்பது குறித்த ராஜ்பாரின் கருத்துக்கு ஆதரவு தெரிவித்த முன்னாள் பாஜக எம்பி சஞ்சீவ் பல்யான், இப்பகுதியை மேம்படுத்த தனி மாநிலங்கள் உருவாக்கப்பட்டால் அது தமக்கு மிகுந்த மகிழ்ச்சி அளிக்கும் என குறிப்பிட்டார். 2012 சட்டமன்றத் தேர்தலுக்கு முன்னதாக, அப்போதைய முதலமைச்சரும் பகுஜன் சமாஜ் தலைவருமான மாயாவதி, மாநிலத்தை நான்காக பிரிக்க சட்டமன்றத்தில் தீர்மானம் நிறைவேற்றியிருந்தார். எனினும் அப்போது மத்தியில் ஆட்சியில் இருந்த காங்கிரஸ் தலைமையிலான UPA அரசு அதன் மீது எந்தவொரு நடவடிக்கையையும் எடுக்கவில்லை என்பது குறிப்பிடத்தக்கது.