ஜெம் வீரமணிக்கு 1989 ல் அறிமுகமான சாந்தி 30 வருடங்களுக்கு மேலாக அவருடன் நகையும் சதையுமாக இருந்து அவர் கேட்டதையெல்லாம் சளைக்காமல் செய்து கொடுத்ததாக கூறுகின்றனர் போலீசார். அதனால் தான் இந்த வழக்கில் A2 வாக சாந்தியை போலீசார் சேர்த்து கைது செய்துள்ளனர். ஜெம் வீரமணியின் அந்த வில்லங்க பாலியல் சேட்டைக்கு உறுதுணையாக இருந்த சாந்தி சொன்ன தகவலின் பேரில் தான் போலீசார் பாதிக்கப்பட்ட சிறுமிகள் ஒவ்வொருவரையும் அடையாளம் கண்டுள்ளனர். முதலில் மூன்று மாதங்களாக விசாரித்த உதவி ஆணையர்கள் யாஸ்மின், காயத்திரி, இன்ஸ்பெக்டர் மகேஷ்குமார் ஆகியோர் சிறுமியை கண்டு பிடிக்க இயலவில்லை என்று நீதிமன்றத்தில் வழக்கை கிடப்பில் போட மனு செய்த நிலையில், மறுவிசாரணைக்கு இந்த வழக்கை கையில் எடுத்த போலீசார் ஒரே நாளில் அந்த வீடியோவில் உள்ள சிறுமியை கண்டுபிடிக்க சாந்தி காரணமாக இருந்ததாக கூறப்படுகின்றது. அந்த அளவிற்கு எந்த நாளில் , எந்த வீட்டிற்கு , எந்த சிறுமியை அழைத்து சென்றோம் என்ற முழுவிபரங்களும் தெரிந்தவராக இருந்த சாந்தி தன் மீது கடந்த ஆண்டு போலீசார் எப்.ஐ.ஆர் பதிவு செய்த பின்னரும் அது குறித்த எந்த கவலையும் இன்றி எப்படியும் தப்பித்து கொள்ளலாம் என்று சந்தோஷமாக ரீல்ஸ் வெளியிட்டு வலம் வந்துள்ளார். அரையும் குறையுமாக நடனம் கற்றுக் கொண்ட சாந்தி, தினமும் ஒரு பாடலுக்கு ஆட்டம் போட்டு ரீல்ஸ் போடுவதை வழக்கமாக வைத்திருந்ததாக கூறப்படுகின்றது. அந்த வகையில் ஜெம் வீரமணி, சாந்தி ஆகிய இருவர் மீதும் போலீசார் கடந்த ஆண்டு வழக்கு பதிவு செய்த பின்னரும் தனது நடனத் திறமையை காண்பித்து வீடியோ போடுவதை அவர் கைவிடவில்லை. கடந்த ஆண்டு அக்டோபர் 7ந்தேதி தொடங்கி கடந்த ஆகஸ்ட் 26ந்தேதி ஓணம் வரை இடைவிடாமல் ரீல்ஸ் வீடியோவில் சதிராட்டம் போட்டுள்ளார் சாந்தி. இதற்கிடையே 29ந்தேதி ஜெம் வீரமணி, சாந்தி, சாந்தியின் கணவர் மகேந்திர சிம்கன் ஆகிய 3 பேர் கைது செய்யப்பட்ட பின்னர் சாந்தி முன் கூட்டியே இந்த வழக்கு குறித்து பேப்பரில் எழுதி வைத்து பேசிய வீடியோ ஒன்றும் தற்போது வெளியாகி உள்ளது. அதில் இந்த வழக்கில் இருந்து தன்னை காப்பாற்றி கொள்ளும் வகையில் பேசி உள்ள சாந்தி தனக்கு காட்பாதராக இருந்த வீரமணி தன்னையும் சிறுவதில் பாலியல் வன்கொடுமை செய்து விட்டதாகவும், 100 சதவீதம் அவரை நம்பி அவர் சொன்னதையெல்லாம் செய்ததாகவும், வீரமணி தன்னை சுய நலத்துக்காக பயன்படுத்திக் கொண்டார் என்றும் சாந்தி தெரிவித்துள்ளார். இந்த வழக்கில் சாந்தி அப்ரூவர் ஆக மாறினால் பெரிய தண்டனைகளில் இருந்து தப்பித்து வெளி நாட்டில் வசிக்கின்ற தனது மகனுடன் செட்டில் ஆகி விடலாம் என்ற திட்டத்தில், முன் கூட்டியே பேசி வைத்த வீடியோ இது என்று கூறப்படும் நிலையில், இந்த வீடியோவை சமூக வலைதளங்களில் பரப்பிவிட்ட சாந்தியின் கூட்டாளிகள் யார் என்பது குறித்து போலீசார் விசாரித்து வருகின்றனர்.