பிரபல தொழிலதிபர் ஜெம் கிரானைட் வீரமணி மீது சிறுமிகள் பாலியல் வன்கொடுமை புகார் அளித்துள்ளதாக தகவல் வெளியாகியுள்ளது. ஏற்கனவே ஒரு சிறுமி தொடர்பான பாலியல் வன்கொடுமை வீடியோ அடங்கிய பென் டிரைவ் போலீசாரிடம் கிடைத்ததாக கூறப்படும் நிலையில், தற்போது மேலும் 9 சிறுமிகள் புகார் அளித்துள்ளதாக தெரிவிக்கப்பட்டுள்ளது. கடந்த ஆண்டு ஆகஸ்ட் மாதம் சென்னை விபச்சார தடுப்பு பிரிவு போலீசாருக்கு வந்த கொரியரில், சிறுமி ஒருவரை பாலியல் வன்கொடுமை செய்வது போன்ற வீடியோ அடங்கிய பென் டிரைவ் இருந்ததாக கூறப்படுகிறது. அந்த வீடியோவில் இருப்பவர் ஜெம் கிரானைட் வீரமணி என போலீசார் அடையாளம் கண்டதாகவும், சம்பந்தப்பட்ட சிறுமியை கண்டறிய முடியவில்லை எனக் கூறி வழக்கை முடிக்க நீதிமன்றத்தில் மனு தாக்கல் செய்ததாகவும் தகவல் வெளியாகியுள்ளது. இந்த வழக்கை முடிக்க போலீசார் தாக்கல் செய்த மனுவை சென்னை நீதிமன்றம் ஏற்க மறுத்ததுடன், சம்பவம் தொடர்பாக முறையாக விசாரணை நடத்த உத்தரவிட்டதாக கூறப்படுகிறது. இதையடுத்து விபச்சார தடுப்பு பிரிவு உதவி ஆணையர் ராஜலட்சுமி தலைமையில் சிறப்பு குழு அமைக்கப்பட்டு விசாரணை மேற்கொள்ளப்பட்டதாக தெரிகிறது. விசாரணையின் போது, வீரமணி பாலியல் வன்கொடுமை செய்ததாக கூறப்படும் சிறுமியை போலீசார் கண்டறிந்ததாகவும், தற்போது 18 வயதை கடந்துள்ள அந்த பெண் அளித்த புகாரின் அடிப்படையில் வழக்குப்பதிவு செய்யப்பட்டதாகவும் தகவல் வெளியாகியுள்ளது. இதன் தொடர்ச்சியாக ஜெம் கிரானைட் வீரமணியுடன் தொடர்புடையதாக கூறப்படும் இடங்களில் விபச்சார தடுப்பு பிரிவு போலீசார் சோதனை நடத்தியுள்ளனர். சென்னை தேனாம்பேட்டையில் வாடகைக்கு எடுக்கப்பட்டதாக கூறப்படும் பங்களாவில் வைத்து சிறுமியை பாலியல் வன்கொடுமை செய்ததாக விசாரணையில் தெரியவந்துள்ளதாக போலீஸ் தரப்பில் கூறப்படுகிறது. இந்த சம்பவத்திற்கு உதவியதாக கூறப்படும் சாந்தி மற்றும் அவரது கணவர் ராஜ சிம்மன் ஆகிய இருவரையும் போலீசார் கைது செய்துள்ளதாக தகவல் வெளியாகியுள்ளது. இந்நிலையில், விசாரணை தொடர்ந்து நடைபெற்று வரும் நிலையில் மேலும் 9 சிறுமிகள் ஜெம் கிரானைட் வீரமணி மீது பாலியல் வன்கொடுமை புகார் அளித்துள்ளதாக கூறப்படுகிறது. புகார் அளித்தவர்களை சென்னை போக்சோ நீதிமன்றத்தில் ஆஜர்படுத்திய போலீசார், அவர்களிடம் ரகசியமாக வாக்குமூலம் பெற்றதாகவும் தகவல் வெளியாகியுள்ளது. ஏழ்மையான குடும்பங்களைச் சேர்ந்த சிறுமிகளுக்கு கல்வி உதவித்தொகை வழங்குவதாகக் கூறி, பின்னர் பாலியல் வன்கொடுமை செய்ததாக அந்த சிறுமிகள் வாக்குமூலம் அளித்துள்ளதாக போலீஸ் விசாரணை தொடர்பான தகவல்கள் தெரிவிக்கின்றன. தேனாம்பேட்டையில் உள்ள பங்களாவில் வைத்து தங்களுக்கு பாலியல் வன்கொடுமை நடந்ததாகவும் அவர்கள் தெரிவித்துள்ளதாக கூறப்படுகிறது. ஜெம் கிரானைட் வீரமணிக்கு எதிராக அடுத்தடுத்து பாலியல் புகார்கள் வெளியாகியுள்ள நிலையில், சம்பவம் தொடர்பாக போலீசார் தீவிர விசாரணை மேற்கொண்டு வருகின்றனர். இந்த வழக்கில் மேலும் யாருக்கேனும் தொடர்பு உள்ளதா என்பது குறித்தும் விசாரணை நடைபெற்று வருவதாக தகவல் வெளியாகியுள்ளது.