சென்னை அண்ணா நகரை சேர்ந்த தன்னார்வலர் ஒருவர், மாவட்ட குழந்தைகள் நல அதிகாரிகளிடம் பிரபல தொழிலதிபர் ஒருவர் சிறுமிகளை பாலியல் வன்கொடுமை செய்ததாகவும் அதற்கான ஆதாரம் பென் டிரைவில் உள்ளதாகவும் , அவர் யார் என்ற விவரத்துடன் கடந்த ஆண்டு அக்டோபர் மாதம் கொடுத்துள்ளார். மாவட்ட குழந்தைகள் நல அதிகாரிகள் வீடியோ ஆதாரத்தோடு கடந்த அக்டோபர் 6 ஆம் தேதி அன்று சென்னை பெருநகர காவல், விபச்சார தடுப்பு பிரிவு ஆய்வாளர் மகேஷ்குமாரிடம் புகார் ஒன்றை அளித்தனர். அதில், பிரபல தொழிலதிபர் ஜெம் கிரானைட்ஸ் வீரமணி தனது கூட்டாளியும் தொழிலதிபருமான சாந்தி என்பவரின் வீட்டில் உள்ள படுக்கையறையில் சிறுமி ஒருவருடன் பாலியல் வன்கொடுமையில் ஈடுபட்டுள்ளனர். இது குறித்து விசாரணை நடத்தி சம்மந்தப்பட்ட நபர்கள் மீது நடவடிக்கை எடுக்க வேண்டும் என புகார் அளித்தனர். பல கிராணைட் மலைகளை விழுங்கிய கோடீஸ்வரர் வீரமணி என்பது தெரியவந்ததும் அவர் மீது வழக்கு பதிவு செய்த காவல் ஆய்வாளர் மகேஷ்குமார், பாதிக்கப்பட்ட சிறுமியை அடையாளம் காண இயலவில்லை என கூறி வழக்கை ரத்து செய்ய உதவி ஆணையர் யாஸ்மினிடம் கூறியுள்ளார். அவரும், அதனை ஏற்று போக்சோ நீதிமன்றத்தில் வழக்கை ரத்து செய்ய பிப்ரவரி மாதம் மனு செய்துள்ளார். ஆனால் இந்த வழக்கை ரத்து செய்ய மறுத்த விசாரித்த நீதிபதி பத்மா, வழக்கை திறமையான போலீஸ் அதிகாரிகளை கொண்டு மறு விசாரணை நடத்துமாறு உத்தரவிட்டார். ஆனால் அப்போதிருந்த காவல் உயர் அதிகாரிகள் இந்த போக்சோ வழக்கை விசாரிக்காமல் கிடப்பில் போட்டதாக கூறப்படுகின்றது. புதிதாக சென்னை காவல் ஆணையராக பதவியேற்ற அமல்ராஜ், நிலுவையில் உள்ள பழைய வழக்குகளை ஆய்வு செய்த போது இந்த வழக்கு குறித்த தகவல் தெரிய வந்தது. உடனடியாக விசாரணை செய்து மூவர் மீதும் நடவடிக்கை எடுக்கும்படி விபச்சார தடுப்பு பிரிவு அதிகாரிகளுக்கு உத்தரவிட்டார். விசாரணையை முன்னெடுத்து பாதிக்கப்பட்ட சிறுமியை அடையாளம் கண்டு வாக்குமூலம் பெற்ற போலீசார் கடந்த ஆகஸ்ட் மாதம் 29 ஆம் தேதி ஜெம் கிரானைட்ஸ் உரிமையாளர் வீரமணி(84), அவரது தோழியும் தொழிலதிபருமான சாந்தி, அவரது கணவர் மகேந்திர சிம்ஹன் ஆகிய மூவரை கைது செய்தனர். இந்த வழக்கை விசாரித்த நீதிமன்றம் வீரமணியை 3 நாட்கள் போலீஸ் காவலில் வைத்து விசாரிக்க அனுமதி வழங்கி உத்தரவிட்டது. வீரமணியின் உடல் நிலையை கருத்தில் கொண்டு புழல் சிறையிலேயே வைத்து விசாரிக்க அனுமதி கொடுத்தது. விசாரணையில் மேலும், பல்வேறு திடுக்கிடும் தகவல்கள் வெளியானது. 84 வயதிலும் வீரமணி பல பெண்கள் மற்றும் சிறுமிகளுடன் உல்லாசமாக இருப்பதை வாடிக்கையாக கொண்டவர் எனவும், இதற்காகவே போயஸ் கார்டன் பகுதியில் 2 லட்சம் ரூபாய்க்கு சொகுசு பங்களா ஒன்றை வாடகைக்கு எடுத்து தனது தோழியும் தொழிலதிபருமான சாந்தி - மகேந்திர சிம்ஹன் தம்பதியினரை அங்கு தங்க வைத்து தனது அசிங்கத்தை அரங்கேற்றி வந்தது போலீசார் விசாரணையில் தெரியவந்தது வீரமணி ஒவ்வொரு முறையும் புதுப்புது சிறுமிகள் மற்றும் இளம் பெண்களை சொகுசு பங்களாவிற்கு வரவழைத்து பாலியல் வன்கொடுமை செய்து வந்ததாகவும், குறிப்பாக ஆதரவற்ற குழந்தைகள், ஏழ்மையான பள்ளி மற்றும் கல்லூரியில் படிக்கும் மாணவ, மாணவிகளுக்கு உதவி செய்ய அறக்கட்டளை ஒன்று தொடங்கி அதன் மூலம் சிறுமிகளை தனது வலையில் சிக்கவைத்துள்ளார். சாந்தி மற்றும் அவரது கணவர் ஆகியோர் பணம் கொடுத்து அழகான சிறுமிகள் மற்றும் கல்லூரி பெண்களுக்கு போயஸ் கார்டனில் உள்ள பங்களா வீட்டிற்கு அழைத்து வந்து அவர்களுக்கு மதுபானம் கொடுத்து வீரமணியுடன் உல்லாசமாக இருக்க பணம் கொடுத்தும், சிலரை மிரட்டி கட்டாயப்படுத்தியதும் போலீசார் விசாரணையில் தெரியவந்தது. குறிப்பாக குடிசை பகுதியில் உள்ள பெண்கள் மற்றும் ஏழ்மை நிலையில் உள்ள சிறுமிகளையே குறி வைத்து பலர் மூலமாக மூளை சலவை செய்து இந்த கொடுமை நடந்துள்ளது. சிறுமிகளை குளிப்பாட்டி மணப்பெண் போல அலங்கரித்தும், அதே போல வீரமணியும் புதுமாப்பிளை போல அலங்கரித்தும் பாலியல் வன்கொடுமையில் ஈடுப்படுவதும், அவற்றை வீடியோவாக பதிவு செய்து தனது தொழில் பார்டனர்கள் சிலர் மற்றும் நண்பர்களுக்கு அனுப்பி வந்தாகவும் கூறப்படுகின்றது தேனாம்பேட்டை வீடு, முட்டுகாடு பங்களா, ராயப்பேட்டை பங்களா , ஜெம் அலுவலகம் என ஒவ்வொரு இடத்திலும் இந்த கொடுமை நடந்துள்ளது. மேலும் 9 சிறுமிகளை ஜெம் வீரமணி பாலியல் வன்கொடுமை செய்தது தெரியவந்த நிலையில் , அந்த 9 சிறுமிகளையும் அடையாளம் கண்டு சென்னை போக்சோ நீதிமன்றத்திற்கு அழைத்துச் சென்று போலீசார் ரகசியமாக வாக்குமூலம் பெற்றுள்ளனர். குறிப்பாக, தங்களின் ஏழ்மை நிலையை பயன்படுத்தி கல்வி உதவித் தொகை கொடுத்தும், மிரட்டியும் ஜெம் வீரமணி தங்களை பாலியல் வன்கொடுமை செய்ததாக சிறுமிகள் வாக்குமூலம் அளித்துள்ளதாக போலீசார் தகவல் தெரிவித்துள்ளனர். 2025 ஆம் ஆண்டு சென்னை காவல்துறையில் பணியாற்றிய சென்னை காவல்துறையின் உயரதிகாரி உள்ளிட்ட அதிகாரிகள் போக்சோ வழக்கில் சிக்கிய தொழிலதிபர்கள் 3 நபர்களை தப்ப வைத்துள்ளதாகவும், முக்கிய அரசியல் கட்சியின் நிர்வாகிகள் இதற்காக பெருமளவில் பணம் பெற்றதாகவும் கூறப்படுகிறது. அப்போதைய விபச்சார தடுப்பு பிரிவு காவல் ஆய்வாளர் மகேஷ்குமார் முதல் ஆளாக சிக்க வாய்பிருப்பதாக கூறப்படுகின்றது. கடந்த அக்டோபர் மாதம் வீரமணியின் வீட்டிற்கு சென்ற போது அங்கு தோழி சாந்தி மட்டும் இருந்துள்ளார். அப்போது அரசியல் செல்வாக்கில் உச்சத்தில் இருந்த ஒருவரின் பெயரை குறிப்பிட்ட மகேஷ்குமார், இந்த வழக்கில் இருந்து அனைவரையும் விடுவிப்பதாக கூறி வீரமணியிடம் இருந்து பல கோடி ரூபாய் பெற்றதாக கூறப்படுகின்றது. இதையடுத்து வீரமணி தான் குற்றவாளி என நிரூபிக்க போதிய ஆதாரம் இல்லை, சிறுமியையும் கண்டுபிடிக்க முடியவில்லை எனக்கூறி வழக்கை முடித்து விடலாம் என கூறி ஏசி யாஸ்மினை தவறாக வழி நடத்தியதாக கூறப்படுகிறது. ஜனவரி மாதம் விபச்சார தடுப்பு பிரிவில் இருந்து ஏர்போர்ட் காவல் நிலையத்திற்கு மகேஷ்குமாருக்கு மாறுதல் உத்தரவு வந்த பின்பும், ஒரு மாத காலம் பணியிடம் மாறாமல் இந்த வழக்கை முடித்துக் கொடுக்ப்பதற்காக அதே பணியில் தொடர்ந்ததாக கூறப்படுகின்றது. மேலும் ரயில்வே யூனியன் தலைவர் ஒருவரின் மகன் மற்றும் முக்கிய அரசியல் கட்சியின் சாதி பிரிவு தலைவர் மூலமாகவும் ஜெம் வீரமணி வழக்கை கிடப்பில் போட பணப்பட்டுவாடா நடைப்பெற்றதாக கூறப்படுகின்றது. வழக்கில் இருந்து தப்பிக்க ஈசிஆர் பகுதியில் உள்ள 120 கோடி ரூபாய் மதிப்புள்ள நிலத்தை 60 கோடிக்கு விற்றதாகவும், நீலகிரியில் பகுதியில் உள்ள நிலத்தை 10 கோடிக்கு விற்றும் வீரமணி செட்டில் மெண்ட் செய்ததாகவும் தகவல் வெளியாகியுள்ளது. தமிழக முதல் அமைச்சர் விஜய் நேரடியாக இந்த வழக்கு விசாரணை குறித்து முழுமையாக கவனம் செலுத்தி ஒருவர் கூட தப்பி விடக்கூடாது என்று உத்தரவிட்டுள்ளதால், காவல் ஆணையர் அமல்ராஜ் இந்த விவகாரத்தில் யார் யாருக்கு தொடர்புள்ளது. அப்போது வீரமணி மற்றும் அவரது கூட்டாளிகளை தப்ப வைத்த சென்னை காவல்துறையின் உயர் அதிகாரிகள் யார் யார்? எவ்வளவு பணம் கைமாறியது என்று விசாரணையை தீவிரப்படுத்தியுள்ளார். போலீசாரின் கையில் கிடைத்த பென் டிரைவ் மற்றும் வீரமணியிடம் கைப்பற்றப்பட்ட லேப்டாப் செல்போன்களை சைபர் போலீசார் உதவியோடு ஆய்வு மேற்கொண்டதில் 50க்கும் மேற்பட்ட ஆபாச வீடியோக்கள் கைப்பற்றப்பட்டுள்ளது. அதில் உள்ள பாதிக்கப்பட்ட சிறுமிகளை அடையாளம் காண பெண் காவல் ஆய்வாளர்கள் தலைமையில் தனிப்படை அமைக்கப்பட்டுள்ளதாகவும், வீரமணியால் பாதிக்கப்பட்டவர்களின் எண்ணிக்கை மேலும் அதிகரிக்கும் எனவும் போலீசார் தரப்பில் தெரிவிக்கப்பட்டுள்ளது.