வட அமெரிக்கா மற்றும் ஐரோப்பிய கண்டங்களை ஒப்பீட்டளவில் சுருக்கியும், ஆப்பிரிக்க கண்டத்தை அதன் உண்மையான நிலப்பரப்புக்கு ஏற்ப பெரிதாகக் காட்டும் ‘Equal Earth’ உலக வரைபடத்தை ஏற்க வலியுறுத்தும் தீர்மானம் ஐக்கிய நாடுகள் சபையில் நிறைவேற்றப்பட்டுள்ளது. நிலப்பரப்பின் அடிப்படையில் வட அமெரிக்காவை விட ஆப்பிரிக்கா மிகப்பெரிய கண்டமாக இருப்பதைச் சரியாக பிரதிபலிக்கும் வகையில் உலக வரைபடத்தில் மாற்றம் கொண்டு வர வேண்டும் என்ற நோக்கில் இந்தத் தீர்மானம் முன்வைக்கப்பட்டது. கடந்த 1569ஆம் ஆண்டு பெல்ஜியத்தைச் சேர்ந்த கார்ட்டோகிராபர் ஜெரார்டஸ் மெர்கேட்டர் உருவாக்கிய ‘மெர்கேட்டர் புரொஜெக்ஷன்’ உலக வரைபடம் பல நூற்றாண்டுகளாகப் பயன்படுத்தப்பட்டு வருகிறது. இந்த வரைபடத்தில் பூமியின் வெவ்வேறு பகுதிகளின் நிலப்பரப்பு அளவுகள் துல்லியமாக பிரதிபலிக்கப்படுவதில்லை. குறிப்பாக, வட அமெரிக்கா மற்றும் ஐரோப்பிய நாடுகள் அவற்றின் உண்மையான அளவை விட பெரிதாகத் தோற்றமளிக்கின்றன. இதற்கு மாற்றாக, கண்டங்களின் நிலப்பரப்பு அளவுகளை ஒப்பீட்டளவில் துல்லியமாகக் காட்டும் Equal Earth வரைபடத்தைப் பயன்படுத்துவதற்கு ஆதரவு தெரிவிக்கும் தீர்மானம் ஐநாவில் கொண்டுவரப்பட்டது. இந்தத் தீர்மானத்தின் மீதான வாக்கெடுப்பில் மொத்தம் 165 நாடுகள் பங்கேற்ற நிலையில், 164 நாடுகள் ஆதரவாக வாக்களித்தன. அமெரிக்கா மட்டும் தீர்மானத்திற்கு எதிராக வாக்களித்தது. இதன் மூலம் ஆப்பிரிக்காவின் உண்மையான நிலப்பரப்பு அளவை உலக வரைபடத்தில் சரியாகப் பிரதிபலிக்கும் வகையிலான மாற்றத்திற்கு ஐநா உறுப்பு நாடுகள் பெரும் ஆதரவை தெரிவித்துள்ளன.